Plantun de Prouvènço

Pèr coumpara dos planto d'encò nostre

Euonymus latifolius & Scleranthus annuus

Bounet-de-capelan(-di-làrgi-fueio)

Euonymus latifolius

Celastraceae

Àutri noum : Fusan, Coulougnet, Grano-pesoulino.

Nom en français : Fusain à larges feuilles.

Descripcioun :
Aquéu bounet-de-capelan-di-làrgi-fueio trachis pulèu dins li faio de mountagno, li pendis e li gaudre umide. Sèmblo proun à Euonymus europaeus, pamens si fueio soun mai larjo emé mens de costo (5 à 6 paréu) e subretout li flour e li fru soun pentamèro (5 petalo e 5 grano e pas 4). Peréu, lou dessubre di boursèu soun cresta (redoun encò l'autre). Coumpara emé lou bounet-de-capelan qu'èi tetramèro.

Usanço :
A bessai li mémis usanço que lou bounet-de-capelan.

Port : Aubret
Taio : 1 à 3 m
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Euonymus
Famiho : Celastraceae

Ordre : Celastrales

Coulour de la flour : Blanco
Petalo : 4
Ø (o loungour) flour : 6 à 10 mm
Flourido : Printèms

Sòu : Ca
Autour basso e auto : 400 à 1600 m
Aparado : Noun
Mai à jun

Liò : Faio - Gaudre
Estànci : Mesoumediterran à Mountagnard
Couroulougi : Mediterrano-mountagnouso
Ref. sc. : Euonymus latifolius

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.